އަލީގެ ކުލަތަކާއި ލޮލަށް ކުލަތައް އިހުސާސް ކުރެވޭގޮތް
1660 ގައި އިނގިރޭސިވިލާތުގެ ފިޒިކްސް އަދި ހިސާބުގެ ޢިލްމުވެރިޔާ ނިއުޓަން އަލިބޭނުންފުޅު ކުރައްވައިގެން ހެއްދެވި އެކްސްޕެރިމެންޓްތައް ވެގެންދިޔައީ ޔޫރަޕްގައި އޮޕްޓިކްސްގެ އައު އިންގިލާބެއް ގެނައި ދުވަސްވަރަކަށެވެ. ނިއުޓަން އަނދިރިކޮޓަރިއެއްގައި ހުންނަވާ ބިތުގެ ލޯވަޅަކުން އަންނަ އަލި ޕްރިޒަމްއެއްގެ ތެރެއިން ފޮނުއްވަވާ ހުދު އަލީގައި އެކުލެވިގެންވާ 7 ކުލަ ވަކިވަކިން ފެންނަގޮތް ދެއްކެވިއެވެ. އަދި ދެވަނަ ޕްރިޒަމްއެއްގެ އެހީގައި އެ 7 ކުލަ އަބުރާ އެއްކޮށް ހުދުކުލައަށް ބަދަލު ކުރެވޭގޮތް ވެސް ދެއްކެވިއެވެ. ނިއުޓަން އިތުރަށް ވިދާޅުވެފައިވަނީ ތަކެތި އެކިކުލައިން ފެންނަނީ ތަކެތީގެ ސާފޭސް އިން ބައެއްކުލައިގެ އަލި އެބްޒޯބްކޮށްފައި އަނެއްބައި އަލި ރިފްލެކްޓް ކޮށް ލޮލަށް އެޅޭތީއެވެ. ނިއުޓަންގެ ކުލަ ސްޕެކްޓްރަމްގައި ހިމެނިފައިވާ 7 ކުލައަކީ ރަތާއި އޮރެންޖާ ރީދުލާ ފެއްސާ ނުލާއި އިންޑިގޯއާ ވައިލެޓް ކުލައެވެ. އިންސާނާގެ ލޯ މަސައްކަތްކުރަނީ މައިގަނޑު ކިތައްކުލައިންތޯ ސައިންސްވެރިންގެ މެދުގައި ދުވަސްތަކަކައް ބަހުސް ކުރެވެމުން ދިއައެެވެ. ތޯމަސް ޔަންގ ވިދާޅުވެފައި ވަނީ ޕްރައިމަރީ 3 ކުލައަކީ ރަތާއި ފެއްސާ ވައިލެޓް ކަމުގައެވެ. އަދި ޖޭމްސްކްލާކް މެކްސްވެލް ވިދާޅުވެފައިވަނީ އެއީ ރަތާއި ފެއްސާ ނޫ ކަމުގައެވެ. ލޮލުގެ އެތެރޭ ބިއްދޮށުގައި ރެޓިނާކިޔާ ބައެއްވެއެވެ. މިބައިގައި ދެބާވަތެއްގެ އަލިއަށް މަސައްކަތްކުރާ ސެލްތަކެއްވެއެވެ. މި ސެލްތަކަށް އަލިއެޅުމުން ސިކުޑިއަށް އެމައުލޫމާތު ފޮނުވާދީ ފެންނަމަންޒަރު އިހުސާސްކޮށްދެއެވެ. ކޯން ސެލްތައް އެންމެ ހަރަކާތްތެރިވަނީ ގަދަ އަލީގައެވެ. ރޮޑްސެލް އަނދިރީގައެވެ. ގާތްގަޑަކަށް 6-7 މިލިޔަން ކޯން ލޮލުގައިވާއިރު މީގެ ތެރެއިން ގާތްގަޑަކަށް 64 އަިންސައްތަ ކޯން ސެލް އެންމެ ހަރަކާތްތެރީ ރަތް އަލިއަށެވެ. އަދި 34 އިންސައްތަ އެންމެ ހަރަކާތްތެރީ ފެހި އައްޔަށެވެ. އަދި 2 އިންސައްތަ އެންމެ ހަރަކާތްތެރީ ނޫ އަލި އަށެވެ. އިތުރު އެހެން ކުލަތައް އަޅުގަނޑުމެންނަށް އިހުސާސްވަނީ ގުޅިގެން މިސެލްތައް ކުރާ މަސައްކަތުންނެވެ.