އިރުގެ ދައުރުކުރުން ހުއްޓުން
އިރު ދައުރުކުރާތަން ދުނިޔެއަށް ފެންނަ ސަބަބަކީ ދުނިޔެ އަމިއްލައަށް އެބުރޭ އެނބުރުމެވެ. ބައެއް ސައެންސްވެރިން ދެކެނީ މިދެގެލްސީ އެއްވާއިރު ތަރިތަކުގެ އޯބިޓައް ބަދަލުތަކެއް އަންނާނޭ ކަމުގައެވެ. ނަމަވެސް ދުނިޔޭގެ ދައުރުކުރުމަށް ވާނެގޮތް ކަނޑައެޅިގެން ބުނެދޭކަށް ނޭގެއެވެ. ކީރިތި ޤުރުއާންގައި އިރު ދައުރުކުރުން ހުއްޓޭނޭ ކަމުގައި ތިރީގައިވާ އާޔަތުން އެނެގެއެވެ.
وَالشَّمْسُ تَجْرِي لِمُسْتَقَرٍّ لَّهَا ۚ ذَٰلِكَ تَقْدِيرُ الْعَزِيزِ الْعَلِيمِ ﴿٣٨﴾
އަދި އިރު، އެއަށް ކަނޑައެޅި قرار ވަނިވި ތަނަކަށް ދާނދެން ހިނގަހިގާ ހުރެތެވެ. އެއީ عزيز ވަންތަ، މޮޅަށް ދެނެވޮޑިގެންވާ ރަސްކަލާނގެ މިންވަރުކުރައްވާފައިވާ ގޮތެވެ. (ޤުރުއާން، 36:38)
ސައިންޓިފިކްގޮތުން ބަލާނަމަ سورة يس ގެ 38 ވަނަ އާޔަތުގައިބަޔާންކުރާ ޙާލަތާއި މެދު ދެ ގޮތަކަށް ވިސްނިދާނެއެވެ. ފުރަތަމަ ގޮތަކީ ދުނިޔެއިން އިރު ހިނގާކަމަށް މި ފެންނަގޮތަށް މިލްކް މެޑާގެލެކްސީގައި އިރުގެ ނިޒާމް ޤަރާރުވަންދެން ކުރިއަށް ދިއުމެވެ. މިލްކްމެޑާ ގެލްކްސީ އުފެދޭއިރު އިރު އިންނާނީ ރެޑް ޖަޔަންޓް ސްޓޭޖެގައެވެ. އަދި މިތަނުގައި އިރުގެ ބާކީ ދުވަސްތައް ހޭދަކުރެއެވެ.
އެންޑްރޮމެޑާ ގެލެކްސީ އާއި މިލްކީވޭ ގުޅި މިލްކްމެޑާ އުފެދޭގޮތް
ދެވަނަ ގޮތަކީ މިލްކްމެޑާ ގެލެކްސީ އުފެދުމުގެ ހާދިސާ ފަދަ އާދަޔާ ޚިލާފު ބިޔަ ހާދިސާއެއް މެދުވެރިވެގެން އިރުގެ ދައުރުކުރުން ހުއްްޓޭތަން ދުނިޔެއަށް ފެނުމެވެ. މިސާލަކަށް އެހެންތަރިއެއްގެ އޯބިޓުގައި އިންނަ ބޮޑު ޕްލެނެޓެއް ފަދަ އެއްޗެއް ދުނިޔޭގައި ޖެހި ނުވަތަ އެހެންބޮޑުތަރިއެއް ނުވަތަ ޕްލެނެޓެއްގެ ދަމާބާރުގެ އަސަރުކޮށް ދުނިޔޭގެ އެނބުރުން ލަސްވެ އޯބިޓް ބަދަލުވެގެން މިފަދަކަމެއް ވެދާނެއެވެ. މިގޮތުން ދުނިޔެ އިރުވަށާ އެނބުރޭ މުއްދަތާއި ދުނިޔޭގެ ރޭދުވާލުގެ ވަޤުތާއި ދިމާވެއްޖެނަމަ އިރާދިމާއަށް އަބަދު ހުންނާނީ ދުނިޔޭގެ އެއް ފަރާތް ދިމާވެފައެެވެ. މިގޮތައް ވުމަށް ސައިންސްވެރިން ބުނެ އުޅެނީ “ޓައިޑަލީ ލޮކް” ވުމެވެ. ގިނަ އެންސްޓްރޮނޮމާއިން ބުނާގޮތުން އަހަރެމެންގެ ގެލެކްސީގައި ފިނިހޫނު މިނުގެ ގޮތުން ދުނިޔެއާއި އެއް މިންވަރަކަށް ހުންނަ ގިނަ ޕްލެނެޓްތައް ހުރުން ގާތީ މި ގޮތަށެވެ. (އެންޑާސް، 2019). ޕްލެނެޓް ވީނަސް 255 ދުވަހުން އިރުވަށައި ބުރެއްޖަހާއިރު ރެއާއި ދުވާލުގެ ދިގުމިނަކީ 243 ދުވަހެވެ. ގާތްގަޑަކަށް ޓައިޑަލްލޮކް ވުމާއި ކައިރީގައި ވާކަން ފެނެއެވެ. ދުނިޔެވަށާ ހަނދު އެބުރެނީ ޓައިޑަލީ ލޮކްވެގެންނެވެ. މިގޮތުން ހަނދު ދުނިޔެވަށާ 27 ދުވަހުން ބުރެއްޖަހާއިރު ހަނދު އަމިއްލައަށް ބުރެއްޖަހަނީވެސް 27 ދުވަހުންނެވެ، ނަތީޖާއެއްގެ ގޮތުން ދުނިޔެއަށް އަބަދުވެސް ފެންނާނީ ހަނދުގެ އެއްފަރާތެވެ.
ހަނދު ދުނިޔެއާއި ޓައިޑަލް ލޮކް ވެފައި
ދުނިޔޭގެ އެނބުރުން ދަނީ މަޑުމަޑުން ލަސްވަމުންނެވެ. އެއީ މޫސުމާއި، ކަނޑާއި ހަނދުގެ ދަމާބާރުގެ ސަބަބުންނެވެ. މީގެ 1.4 ބިލިޔަން އަހަރުކުރިން ރެޔާދުވާލުގެ ދިގުމިނަކީ 18.7 ގަޑިއިރުކަން ދިރާސާއަކުން ހޯދާފައިވެއެވެ. ވުމާއެކު މިހާރު ލަސްވަމުންދާ ނިސްބަތުން އިރު ރެޑްޖަޔަންޓް ސްޓޭޖްއަށް އަންނަ އިރުވެސް ޓައިޑަލް ލޮކް އިރާއި ދުނިޔެ ނުވާނެއެވެ. މިކަން އޭގެ ކުރިން ވިޔަސްވާނީ މިލްކީވޭ އާއި އެންޑްރޮމެޑާ ގެލެކްސީ އެއްވާފަދަ އާދަޔާއި ޚިލާފް ހާދިސާއެއްގެ ތެރެއިންނެވެ. މިގޮތަށް ދުނިޔެ ޓައިޑަލް ލޮކް ވެއްޖެނަމަ އިރު އެއްދިމާއެއްގައި ޤަރާރުވެ ހުންނަތަން ފެންނާނެއެވެ، އަދި އިރުމަތީފަރާތުން އިރު އަރާ ދެކުނަކަށް ނުމެ އޮއްސޭނެއެވެ. ދުނިޔޭގެ އެއްފަރާތަށް އަބަދު އިރުއަރާފައިވާއިރު އަނެއް ފަރާތައް އަބަދުފެންނާނީ އަނދިރިކޮށެވެ. ރެޔާއި ދުވާލު ބަދަލެއް ނުވާނެއެވެ. ދުނިޔޭގެ މޫސުމަށް ބޮޑެތި ބަދަލުތަކެއް އަންނާނެއެވެ. ސައިންސްވެރިން ބުނާ ގޮތުގައި އިރުގެ ނިޒާމު އުފެދުމުގެ ކުރީކޮޅުގައި ހަނދު އުފެދުނުއިރު މިފަދަ މުޑި އެރުންތައް އިރުގެ ނިޒާމުގެ ޕްލެނެޓްތަށް ތަޖުރިބާ ކޮށްފައިވެއެވެ. ޔުރޭނަސްގެ ކަތި އެންގަލް 97 ޑިގްރީއަށް ބަދަލުވެފައިވަނީ ވެސް އެފަދަ މުޑިއެރުންތަކުގެ ސަބަބުންކަމަށް ސައިންސްވެރިން ބުނެއެވެ.