8 ހިނދުން ހިނދަށް ކަންވުން
ޑ.ރ. ނީލް ޑިގްރާސް ޓައިސަންގެ ޖަވާބުން އަހަރެމެން ހިންހަމަޖެހޭ ޖަވާބެއް ލިބުނުހެއްޔެވެ؟ ޔަޤީންކަމާއެކު ބުނަން އެނގެނީ މި ޔުނިވާރސްގެ ކަންކަން ހިގަމުންދަނީ ވަރަށް ތަރުތީބުން ކަމުގައެވެ. އެ ސުވާލަށް ކިރިޔާވެސް ޖަވާބެއް ލިބެން އޮތީ ކުއަންޓަމް މެކޭނިކްސް އިންނެވެ. ކުއަންޓަމް މެކޭނިކްސް އަކީ އެލެކްޓްރޯނާ، ފޯޓޯން (އަލީގެ އެތިކޮޅުތަކެއް) ފަދަ ކުދިކުދި ފަންޑަމެންޓަލް ޕާޓިކަލްތަކާ ގުޅޭ ޢިލްމެވެ. މި މައުޟޫއަށް އެހެން މަޒްމޫނެއް ލިޔަންގަސްދުކުރާތީ މި މަޒްމޫނަށް ބޭނުންވާ މިންވަރަށް މިތަނުގައި ދަންނަވާލާނަމެވެ. ކުއަންޓަމް މެކޭނިކްސްގައި ޕޯޓޯން ފަދަ ޕާޓިކަލްތައް އެންޓެންގްލް ކުރެވެއެވެ. މީގެ މާނަޔަކީ ޕާޓިކަލް ގުޅުވާލެވެއެވެ. މިގޮތަށް ގުޅުވާލެވިފައިވާ ދެޕާޓިކަލް އިން އެއް ޕާޓިކަލް ކިތައްމެ ދުރަކަށް ގެންދިޔަޔަސް އެއްޕާޓިކަލްގެ ހާލަތައް ގެންނަބަދަލު (ސްޕިން، މޮމެންޓަމް، ޕޯލަރައިޒޭޝަން ފަދަ) އަނެއް ޕާޓިކަލްއަށް ވަގުތުން އެނގެއެވެ. ވުމާއެކު ފުރަތަމަ ޕާޓިކަލް އަށް ގެންނަ ބަދަލުގެ އެހީގައި އަނެއްޕާޓިކަލްއަށް އަންނަ ބަދަލު ވަރަށް ޔަޤީންކަމާއެކު ބުނަން އެނގެއެވެ. މި ދެޕާޓިކަލްގެ ދެމެދުގައި މަޢުލޫމާތު ބަދަލު ކުރެވެނީ ކޮންގޮތަކަށް ކަމެއް ނޭގުނަސް ހިނދުން ހިނދަށް މި މަޢުލޫމާތު ބަދަލުކުރެވެއެވެ. މިއީ އައިންސްޓައިންބުނި “ސްޕޫކީ އެކްޝަން އެޓް ޑިސްޓެންޓް” އެވެ. ނަމަވެސް އެންޓެންގްލް ކުރާ އެންމެ ބާރަށް ދަތުރުކުރެވޭ އެއްޗަކީ އަލީގެ އެތިކޮޅުތައް ކަމަށްވާ ފޯޓޯންއެވެ. ވުމާއެކު ހަޤީގަތުގައި އަލީގެ ސްޕީޑަށް ވުރެ ބާރަކަށް (ސްޕާ ލުމިނަލް ސްޕީޑް) ގައި މައުލޫމާތު ބަދަލުނުކުރެވޭނޭ ކަމަށް ގިނަ ސައިންސްވެރިން މިހާރު ޤަބޫލުކުރެއެވެ. އޭގެ ސަބަބަކީ އެންޓެންގްލް ކުރާ ޕާޓިކަލް ފުރަތަމަ ގެންދަންޖެހޭތަނަކަށް ގެންދެވޭނެ އެންމެ އަވަސް ސްޕީޑަކީ އަލީގެ ސްޕީޑެވެ. ވުމާއެކު ޕާޓިކަލްތައް މުއާސަލާތު ކުރާ ވަސީލަތްތައް އެނގެންދެން އައިސްޓައިންގެ ހޯދުންތައް އެއްލާލެވޭކަށް ނެތެވެ. ކުއަންޓަމް މެކޭނިކްސްއާއި ގުޅޭގޮތުން އައިންސްޓައިންގެ ބައެއް ހީކުރުން ގޯހަސް، 100 އަހަރުވެފައިވާ އޭނާގެ ޖެނެރަލް ރެޓިވިޓީގައި ބަޔާންކޮށްފައިވާ ބްލެކް ހޯލްއާއި ގުޅޭ ވާހަކަތައް ރަނގަޅުކަން ވަރަށް ފަހުން ސައިންސްވެރިން، އެންމެ ފުރަތަ ނެގި ބްލެކްހޯލްގެ ފޮޓޯއިން ކަށަވަރުވެފައި ވެސް ވެއެވެ.