4 އައިސްޓައިންގެ ސްޕެޝަލް ރެލެޓިވިޓީ
ބައެއްކަހަލަ ގުދުރަތީ ކަންކަމާއި ގުޅޭގޮތުން ފުރިހަމަ ޖަވާބު ކްލާސިކަލް (ނިއުޓޯނިއަން) މެކޭނިކްސްއިން ނުލިބުމާއެކު ސައިންސްވެރިން މިފަދަ ކަންކަމާމެދު އެހެން ގޮތްގޮތަށް ވިސްނުން ގެންގުޅުމުގެ ނަތީޖާއެއްގެ ގޮތުން މޮޑަން ފިޒިކްސް ތަރައްޤީވެގެން އައެވެ. އަލްބާރޓް އައިސްޓައިންއަކީ މިފަދަކަންކަމާމެދު ތަފާތުގޮތަކަށް ވިސްނި މީހެކެވެ. މިތަނުގައި އައިންސްޓައިން އޭނާގެ ސްޕެޝަލް ރެލެޓިވިޓީ އުފެއްދުމަށްޓަކައި ހެދި ޚިޔާލީ އެކްސް ޕެރިމެންޓް ތަކުގެ މައްޗަށް އަލިއަޅުވާލާނަމެވެ.
ހ. ސިމަލްޓޭނިޓީ (އެއްވަޤުތަކާ ކަމެއް ހިނގުން)
މަތީގައިވާ ޚިޔާލީ އެކްސްޕެރިމެންޓަކީ އައިންސްޓައިންގެ އެކްސްޕެރިމެންޓްގެ ޚިޔާލުގެ މައްޗަށް ބިނާވެފައިވާ އެއްޗެކެވެ. މި ޚިޔާލީ އެކްސްޕެރިމެންޓްގައި އަލީގެ ސްޕީޑްގެ 80 އިންސައްތަ ބާރުމިނުގައި ދުއްވާފައިދާ ބަހެއް ދެ ގަސް ދެމެދާއި ހަމަވި ވަޤުތު އެއް ފަހަރާ ދެގަހައް ހޮނުއަޅައެވެ. ދެ ގަސް ދެމެދުގައި ބަލަން ހުރި މީހާ (C) އަށް ދެގަަހަށް އެއްފަހަރާ ހޮނުއެޅިތަން ފެނުނަސް ދުއްވާފައިދާ ބަހުގައި އިންމީހާ (D) އަށް ފެންނާނީ A ގަހަށް ވުރެ ކުރިން B ގަހައް ހޮނުއަޅާތަނެވެ. މިހެންވަނީ ބަހާއި B ގަހުން އަންނަ އަލި އެކަތި އަނެކައްޗާ ދިމާއަށް އަންނާތީއެވެ. އަދި A ގަހުން އަންނަ އައްޔާއި ބަސް އެއްކޮޅަކަށް ދާތީއެވެ. އައިސްޓައިން ބުނެފައިވަނީ ވަގުތު ހިނގަނީ އެއްޗެއް ހަރަކާތްތެރިވާ (ނުވަތަ ދަތުރުކުރާ) ގޮތުގެ މައްޗަށް ބިނާކޮށެވެ. ބަލާ އެކަކަށް، އެއް ވަޤުތަކާއި ހިނގާ ކަންކަމަކީ ބަލާ އަނެކާއަށް ކޮންމެހެން އެއްވަޤުތަކު ހިނގާ ކަންކަމެއް ނޫނެވެ. ވުމާއެކު ސިމަލްޓޭނިޓީ އަކީ ރެލެޓިވް އެއްޗެކެވެ. މީގެން އެނގެނީ ނިއުޓަންގެ ފިޒިކްސްގައި ބޭނުންކުރާ ފަދައިން ހުރިހާ އިނާޝިއަލް ރިފަރެންސް ފްރޭމް (ދަތުރުކުރާ އެއްޗެއް) ގައި ވަޤުތަކީ އެކައްޗެއް ނޫންކަމުގައެވެ. ވަޤުތު އެއީ ރެލެޓިވް އެއްޗެއް ކަމުގައެވެ. ނަމަވެސް ކޮންމެ އިނާޝީއަލް ފްރޭމް އޮފް ރެފަރެންސްގައި ގަޑީގެ ވަޤުތު ހިނގާނީ އެއްވަރަކަށެވެ. މި އީ ރެލެޓިވިޓީގައި ކަނޑައަޅާ ފުރަތަމަ ކަމެކެވެ.
ށ. ޓައިމް ޑައިލޭޝަން
ޓައިމް ޑައިލޭޝަން އަކީ ބިމަށް ދަމާބާރުގެ ސަބަބުން ނުވަތަ ބާރަށް ދަތުރުކުރުމުގެ ސަބަބުން ވަޤުތު ލަސްވުމެވެ. މަތީގައިވާ ކުރުހެމުގައި ދައްކާފައިވާ ބޮކްސް ކާރުގައި އިން އަންހެންމީހާ ޓޯޗަކުން އަލީގެ ޕަލްސްތަކެއް ފޮނުވައެވެ. ކޮންމެ ޕަސްލެއް މަތީގައިވާ ލޯގަނޑުގައި ޖެހިފައި އެންބުރި އަންނަނީ 1 ސިކުންތުން ކަމަށް ބަލާށެވެ. އަދި ބޭރުން ބަލާ ފިރިހެންމީހާއަށް ވެސް ފެންނަނީ ހަމަ އެގޮތަށެވެ. ނަމަވެސް ބޮކްސްކާރު އެއް ބާރުމިނެއްގައި ދަތުރުކުރަން ފެށުމުން ބޭރުން ބަލާމީހާއަށް އަލީގެ ކޮންމެ ޕަލްސްއެއްގެ ރާސްތާ ދިގުވެއެވެ. ނަތީޖާއެއްގެ ގޮތުން ބޮކްސްކާރުގެ ސްޕީޑްގެ ނިސްބަތުން 1 ސިކުންތު ހިނގަނީ ލަހުންނެވެ. ނަމަވެސް ބޮކްސްކާރުގައި އިންނަމީހާއަށް ފެންނާނީ ކުރިން ބުނިގޮތައް އަލީގެ ޕަލްސް މައްޗަށްއަރައި ތިރިވާތަނެވެ. އޭނާއަކަށް އެ ދިގު ރާސްތާއެއް ނުފެންނާނެއެވެ. ސަބަބަކީ އަލީގެ ޕަލްސް އާއި އޭނާ، ބޮކްސް ކާރުގެ ސްޕީޑްގައި ކުރިއަށް ދާތީއެވެ. އެހެންކަމުން އޭނާގެ ގަޑި ލަސްވާކަމެއް އޭނާއަކަށް އިހުސާސެއް ނުކުރެވޭނެއެވެ. ނަމަވެސް ރެސްޓްފްރޭމްގައި ހުރި ފިރިހެންމީހާއަށް ދަތުރުކުރާ ފްރޭމްގައި ހުންނަމީހާ ގަޑިލަސްވާތަން ފެންނާނެއެވެ. ގަޑީގެ ހިނގުން ލަސްވާ އަނެއްގޮތަކީ ގްރެވިޓީގެ ސަބަބުންނެވެ. މިގޮތުން ސިންކްރޮނައިޒް ކޮށްފައިވާ ގަޑިތަކެއް ދުނިޔޭގެ ބިމާއި އެކި ހިސާބު އުސްމިނުގައި ހިނގުން ތަފާތުކަން ޖެނެރަލް ރެލެޓިވިޓީގެ ޓެސްޓްތަކުން ދައްކާފައިވެއެވެ. އައިސްޓައިން، ފުރަތަމަ ގްރެވިޓޭޝަނަލް ޓައިމް ޑައިލޭޝަން ގެނަސްފައިވަނީ ސްޕެޝަލް ރެލެޓިވިޓީގައެވެ. ދިރިއުޅުމާއި ގުޅިފައިވާ ޓައިމްޑައިލޭޝަންގެ އެއް މިސާލަކީ ޖީޕީއެސްގައި ބޭނުންކުރާ ސެޓްލައިޓް ބިމާދުރުވުމުން، އަދި ދުނިޔެވަށާ ދައުރުކުރާތީ ދުނިޔޭގެ ގަޑި އާއި އަޅާކިޔާއިރު ލަސްވާ ލަސްވުމެވެ. މިކަމުގެ ސަބަބުން ގަޑިތައް އަބަދުވެސް ހަމަކުރަން ޖެހެއެވެ.
ނ. ލެންތް އަދި ސްޕޭސް ކޮންޓްރެކްޝަން
ދެ ޕޮއިންޓެއް ދޭތެރޭ ދިގުމިން ނުވަތަ ދުރުމިން ބިނާވަނީ ފްރޭމް އޮފް ރެފަރެންސް އަށެވެ. އައިސްޓައިންގެ ރެލެޓިވިޓީގައިވާ މުހިއްމު އަނެއް ޚިޔާލަކީ ލެންތް ކޮންޓްރެކްޝަން އެވެ. ލެންތް ކޮންޓްރެކެކްޝަން އަކީ ބާރަށް ދަތުުރު ކުރާ އުޅަނދެއްގައި ހުންނަ މީހަކަށް އެމީހާގެ ދަތުރުކުރާ މަންޒިލް ގާތްކަމަށް އިހުސާސްވުމެވެ. އަދި އެހެންމެ ދުނިޔޭގައި ހުންނަމީހަކަށްވެސް ޖައްވީ އުޅަނދު ކުރުކަމަށް ދައްކާ ދެއްކުން ވެސް މެއެވެ. ސްޕޭސް އަދި ލެންތް ކުރުވުން ދައްކައިދޭ ކުރެހުމެއް ތިރީގައި އެ ވަނީއެވެ.
