8 އޮށުން ގަސް ފެޅުވުމާއި ގޮފިކޮޅަށް މޫލެއްވުން
8.1 ގަސްފެޅުވުން: ރަގަޅު ފެންވަރުގެ އޮށުން ގަސްފަޅުވާނަމަ އިންދާއޮށުގެ މަތީ އިންސައްތައެއްގެ ގަސްފަޅާނެއެވެ. އޮށް އިންދާނީ ރޮކްވޫލް ނުވަތަ ބޮބިކުނޑިފަދަ މީޑިއަމްއެއްގައެވެ. ބިސްޓްރޭ އަދި އާދައިގެ ޓްރޭ ފަދައެއްޗެއްގައި ވެސް އިންދިދާނެއެވެ. ސްޓާޓާރ ޓްރޭއަކީވެސް އޮށްއިންދަން ޙާއްސަކޮށް ހަދައިފައި ހުންނަ އެއްޗެކެވެ.
ފިގާރ 8.1: އޮށް އިންދާ ސްޓާޓާރ ޓްރޭ
ފިގާރ 8.2: ސްޓާޓާރ ޓްރޭއެއްގައި ގަސްފަޅުވާފައި
އޮށުން ގަސްފެޅުމަށް ކިޔަނީ “ޖާމިނޭޝަން” އެވެ. ބޭނުންވާ އޮށްތައް ރޮކްވޫލް ނުވަތަ ބޮބިކުނޑީގައި އިންދުމަށްފަހު 25ºC އާއި 30ºC އާއި ދެމެދުގެ ހޫނުކަން ލިބޭތަނެއްގައި ބެހެއްޓުމުން އަވަހަށް ގަސްފަޅާނެއެވެ. ތިރީގައިވާ ތާވަލްގައިވަނީ ފިނިހޫނުމިނާއި ގަސް ފެޅުމަށް ނަގާ ދުވަހާއި ގުޅުން ހުރި ގޮތެވެ. ފާހަނގަކޮށްލަންޖެހޭ ނުޤުތާއަކީ ދުވަހުގެ އަދަދު އެކިބާވަތުގެ އޮށުގައިވެސް ތަފާތުވާކަމެވެ. އަދި އަލި ލިބޭ މިންވަރާއި އޮށް އިންދާފައިވާ މީޑިޔަމްގައި ހުންނަ ތެތްފިނިކަމުގެ ސަބަބުންވެސް ދުވަހުގެ އަދަދު ތަފާތުވެދާނެއެވެ.
ތާވަލް 8.1: ފިނިހޫނުމިނާއި އޮށުން ގަސްފަޅާ މުއްދަތާއި އޮންނަ ގުޅުން
މާބޮޑަށް ފިނި ތަނެއްނަމަ ނުވަތަ ވަރަށް ހޫނު ތަނެއްނަމަ ގަސްފެޅުން ލަސްވެއެވެ. ނުވަތަ އެއްގޮތަކަށްވެސް ނުފަޅައެވެ. ބައެއްބާވަތުގެ އޮށުން ގަސްފަޅާއިރު އަލި ލިބެންޖެހެއެވެ. އަނެއްބައި އޮށުން ގަސް ފަޅަނީ އަައްޔާއި އަނދިރީގައެވެ. ލެޓިއުސް ފަޅަނީ އަލި ލިބިގެންނެވެ. މިރުހާއި ޓޮމާޓޯ ފަޅަނީ އަނދިރީގައެވެ. ގަސްފެޅުމަށްޓަކައި އެކަށީގެންވާ މިންވަރަށް އިންދާފައި ހުންނަ މީޑިއަމް ތެތްވާންޖެހެއެވެ. ވުމާއެކު ގިނައިން ފެންދޭންޖެހެއެވެ. އޮށް މާ ފުނުގައި ވަޅުލާކަށް ނުޖެހެއެވެ. އާންމު އުސޫލަކީ އޮށުގެ ބޯ މިނުގެ 3 ގުނަފުނުގައި ވަޅުލުމެވެ. ބޭނުންނުކުރާ އޮށްތައް ފްރިޖްގައި ބެހެއްޓުމުން ރަގަޅުވާނެއެވެ. އޮށް ރައްކާކޮށްފައި ހުންނަން ޖެހޭނީ ހިކި ތަނެއްގައި 0ºC އާއި 5ºC އާއި ދޭތެރޭގެ ފިނިހޫނު މިނުގައެވެ.
8.2 ގޮފިކޮޅަށް މޫ ލެއްވުން: ހައިޑްރޯޕޯނިކްސް ސިސްޓަމްތަކުގައި އިންދާ ގަސް އޮށުންވެސް ފެޅުވިދާނެއެވެ. ނުވަތަ ގަހަކުން ކަނޑާ ގޮފިކޮޅަކަށްވެސް މޫލެއްވިވެސް ދާނެއެވެ. މޫލައްވަން ބޭނުންވާ ގޮފިކޮޅު °45 އަށް ކަތިކޮށް ކަތުރަކުން ނުވަތަ ކަޓަރަކުން ކަނޑާލުމަށް ފަހު އިންދާ ހިސާބުގައި ހުންނަފަތްތައް ވަކިކޮށްލާށެވެ. ކޮންމެވެސް ވަރަކަށް ތޮށިނެގުފަހު މާމުއި އޭގެ ބޭރުގައި ހާކާލާއި ގަސް ރޯކުރާ މީޑިއަމްގައި އިންދާނީއެވެ. ތިރީގައިވާ ކުރެހުމުގައި ދައްކާފައިވަނީ “މިނީ ގްރީން ހައުސް” އެކެވެ. މިނީ ގްރީންހައުސް ހެދުމަށްޓަކައި ބޭނުންވާފުޅި ދެބުރިކުރުމަށްފަހު ތިރީބައިގައި ގަސްއިންދާ ފެންދޭނީއެވެ. ދެން މަތީބައި ތިރީބަޔަށް މަހާލައި ތިރީގައިވާ ފޮޓޯގައިވާ ގޮތަށް ހަދާނީ އެވެ. ގަސް މިގޮތަށް ފުޅީގައި އިންދުމުން ގަސް ބޭރުގައި ބެހެއްޓިއަސް ވާރެއިންނާއި ގަދަވައިން ސަލާމަތް ކޮށްދެއެވެ. ބޭނުންނަމަ ފުޅީގެ މަތިގަނޑުގައި ލޯވަޅެއް އަޅައި މަތިވެސް ޖެހިދާނެއެވެ. ގަސް ޕޮޓުގައި ނުވަތަ ސިސްޓަމްގައި އިންދަންވުމުން ފުޅީގެ މަތިބައި ނައްޓާލައި ކަޓަރަކުން ތިރިބައި ކަފާލައި މީޑިއަމް އާއި އެކު ގަސް ޕޮޓުގައި އިންދާނީއެވެ.
ފިގާރ 8.2: މިނީ ގްރީންހައުސް