ވެލީގައި ހައްދާ ގަސްގަހަށް ބޭނުންވާ ކާނާ ތައްޔާރު ކުރުމާއި ބެލެހެއްޓުން
ޚުލާސާ
މި މަޒްމޫނުގައި އަޅުގަނޑު ބަލައިފައިވަނީ ގަސް ހެދި ބޮޑުވެ މޭވާ އެޅުމަށް ބޭނުންވާ ކާނާ އަކީ ކޮބައިކަމާއި އަދި އޯގަނިކް ފާޓިލައިޒާ ނުވަތަ ކޮމްޕޯސްޓް ހަދާނެ ގޮތެވެ. އަދި އޭގެ އިތުރަށް ވަކިވަކި ކާނާގެ ބާވަތްތައް ލިބޭ އޯގަނިކް ތަކެއްޗަކީ ކޮބައިކަންވެސް ބުނެދެވިފައިވާނެއެވެ. މިމަޒްމޫނުގެ އެހީގައި ފިހާރަތަކުން ކާނާ ގަންނައިރު ސަމާލުކަން ދޭންވާ ކަންކަންވެސް ކިޔުންތެރިޔާއަށް އެނގިގެންދާނެއެވެ. މި މަޒްމޫނުގައި ހިމެނިގެންވާ ބައިތަކަކީ
1 ވެލި
2 އޯގަނިކް ފާޓިލައިޒާ- ކޮމްޕޯސްޓް ހަދާނެގޮތް
3 ފްރައިމެރީ މެކްރޯ ނިއުޓްރިއަންޓްސް (ކާނާ)
4 ސެކަންޑްރީ މެކްރޯ ނިއުޓްރިއަންޓްސް (ކާނާ)
5 މައިކްރޯނިއުޓްރި އަންޓްސް (ކާނާ)
1 ވެލި
ވެލިއަކީ ޤުދުރަތީ ގޮތުން ގަހަށް ކާނާދޭ ޒަރިއްޔާއެކެވެ. ވެލީގައި ހުންނަ އެންމެ މުހިއްމު އެއްޗަކީ ހަލާކުވެ ވީރާނާވެފައިވާ ގަސްގަހާގެއްސާއި ދިރޭތަކެއްޗާއި އަދި އެފަދަކެތީގެ ހަށިތަކުން ބޭރުކުރާ ނަޖިހުގައި ބާވަތްތަކެވެ. މިތަކެތި ވެއްޔާ އެކުވުމުން ވެލީގައި އިންދާ ގަސްގަހާގެއްސަށް ކާނާގެ ގޮތުގައި އެތަކެތި ލިބެން ހުރެއެވެ. ކުރިންދެންނެވި ދިރޭތަކެއްޗާއި އޭގެ ހަށިތަކުން ބޭރުކުރާ ތަކެއްޗަކީ ގަސްގަހާގެއްސަށް ސީދާ ބޭނުންކުރެވޭ ތަކެއްޗެއް ނޫނެވެ. އެތަކެތި ގަސްގަހާގެއްސަށް ބޭނުންކުރެވޭ ގޮތަށް ބަދަލުވެގެންދަނީ ވެލީގައި ދިރިއުޅޭ އެހެނިހެން ސޫފާސޫފި (ޑީކޮމްޕޯސާސް) އޭގެ ކާނަޙޯދުމުގެ ގޮތުން ކުރާ މަސައްކަތްތަކުގެ ތެރެއިންނެވެ. މީގެ ތެރޭގައި ބީޓްލްއާއި ފްލައިއާއި ފަންގަސްގެ ބާވަތްތަކާއި ބެކްޓީރިޔާއާއި ފިނިހަކައާއި ފާޑުފާޑުގެ ފަނިވެސް ހިމެނެއެވެ. މިއީ އެލިސްޓްގެ މަދު ބާވަތްތަކެކެވެ.
މިދެންނެވި ޑީކޮމްޕޯސާސްގެ ގޮތުގައި ބެލެވޭ ބައެއް ބާވަތްތަކަކީ ދަނޑުވެރިންނަށް އުނދަގޫ ދޭ ބާވަތްތަކެއް ވެސް މެއެވެ. މިފަދަތަކެތި މަރުވެފައިވާ ތަކެތި ކާބޮއި ހެދުމުގެ ސަބަބުން މަރުވެފައިވާ ތަކެތި ވިރާނާވެއެވެ. އަދި ބާކީހުންނަތަކެތި ފެނާއެކުވެގެން ގަހުގެ މުލުން ގަހަށް ނެގޭގޮތް ވެއެވެ. އަޅުގަނޑުމެންގެ ހަށިގަނޑުގައި ކާބޯތަކެތި ކުދިކުދިކޮށްލުމަށް ދަތްތަކާއި ގޮހޮރާއި އެހީވިޔަސް ގަސްގަހާގެހީގައި ގޮހޮރުގެނިޒާމެއް ނުވެއެވެ. ވުމާއެކު ގަހަށް އެމަސައްކަތްތައް ކޮށްދެނީ ކުރިންދެންނެވި “ޑިކޮމްޕޯސަރ” އޭކިޔާ ދިރޭތަކެއްޗެވެ.
އަޅުގަނޑުމެން ރަށްތަކުގެ ބިމުގެ ވެއްޔަކީ ކާނާގެ ގޮތުން ވަރަށް ދެރަ ވެއްޔެވެ. ވުމާއެކު މިވެލީގައި ހެދޭ ގަސްގަހުގެ ބާވަތްތައް ވަކި މިންވަރެއްގައި ހުރެއެވެ. ވެއްޔާއި އެކުވެފައިވާ ހިއުމަސް ނުވަތަ ވީރާނާވެފައިވާ އޯގަނިކް ތަކެތީގެ ސަބަބުން ވެއްޔަށް ކަޅުކަމެއް ލިބި، އެފަދަ ވެލީގައި ކޮންމެވެސް މިންވަރެއްގެ ކާނާ ހުރެއެވެ. ރާއްޖޭގެ ވެލީގައި ނައިޓްރިޖަން އާއި ޕޮޓޭސިއަމް އަދި ގިނަ މައިކްރޯ ނިއުޓްރިއަންޓްސް ވެސް މަދެވެ. އެގޮތުން ދަނގަޑާއި މެންގަނީޒް އަދި ޒިންކު ފަދަ މުހިއްމު ނިއުޓްރިއަންޓްސް ވެސް މަދެވެ. މައިގަނޑުގޮތެއްގައި ވެލީގައި ހުންނަނީ ކެލްސިއަމް ފޮސްފޭޓް ކަމުގައިވާތީ ގަހަށް އެ ބޭނުމެއް ނުކުރެވެއެވެ. ރާއްޖޭގެ ވެލީގައި އެވްރެޖްކޮށް ޕީ. އެޗް ވެސް ހުންނަނީ 8 އާއި 8.8 އާއި ދެމެދުގައެވެ. ވުމާއެކު ވެލި އަލްކަލައިންއެވެ. އާންމުކޮށް ގިނަ ގަސްގަސް ހެދެނީ އެވެރެޖްކޮށް ޕީ. އެޗް 6 އާއި 7 އާއި ދެމެދުގައެވެ. ގަސް، ވެލިން ކާނާ ނަގައިދެނީ ވަކިރޭންޖެއްގެ ޕީ. އެޗް އެއް ވެލީގައި ހުރުމުންނެވެ. ވެލީގެ ޕީ. އެޗް މަތި ކުރާނަމަ ލަކުޑިއެނދުމުން އުފެދޭ އަޅި ނުަވަތަ އުވަ އެޅިދާނެއެވެ. ދަށްކުރަން ބޭނުންނަމަ ވެއްޔަށް ސަލްފާ އެޅިދާނެއެވެ.
